Եռօրյա բակային ճամբար Վարդաշենում
Երևանի Վարդաշեն թաղամասում հուլիսի 18-20-ը «Նոր սերունդ» եկեղեցին կազմակերպել էր բակային ճամբար:
Եկեղեցու երիտասարդական և մանկական ծառայությունների համատեղ ջանքերով կազմվեց եռօրյա հագեցած և հետաքրքրիր ծրագիր, որն ուրախություն բերեց ոչ միայն մանուկների համար, այլ նաև մեծահասակների և ամբողջ բակի համար:
Ճամբարի նպատակն էր հոգևոր արժեքներ սերմանել մանուկների սրտերում` խաղերի, երգերի, մրցույթների և պարզապես մտերմիկ շփման միջոցով:
Առաջին օրը տեղի ունեցավ ճամբարի հանդիսավոր բացումը, ներկայացվեցին ծրագիրը ու նպատակը, որից հետո հնչեցին ուրախ հոգևոր մանկական երգեր:
Այնուհետև երեխաները բաժանվեցին 3 խմբերի՝ յուրաքանչյուրն ընտրելով անուն և կարգախոս իր թիմի համար:
Ապա «Անբառ գրքի» գունավոր էջերի օգնությամբ երեխաներին հասանելի լեզվով ներկայացվեց մարդկության փրկության ծրագիրը:
Վերջում ռիթմիկ հնչյունների ներքո մանուկները սովորեցին պարային շարժումներ:
Երկրորդ օրը ևս հագեցած էր ուրախ փառաբանող երգ ու պարով, զվարճալի և միևնույն ժամանակ ուսոցողական խաղերով, որոնց արդյունքում յուրաքանչյուր թիմ վաստակեց միավորներ:
Երրորդ օրը մանուկներին սպասում էին անակնկալներ. ոչ միայն երգ ու պար, ու կրկին մրցույթային խաղեր,
այլև պարգևատրում՝ ըստ անցած երեք օրերի ընթացքում գրանցած ակտիվության և արդյունքների, այնուհետև նրանց հյուրընկալեցին հեքիաթային հերոսներն իրենց նվերներով:
Իսկ ամենավերջում կազմակերպվեց բացօթյա մուլտֆիլմի դիտում, որն էլ ավելի պատկերավոր ու հիշարժան դարձրեց բակային ճամբարը:
Ինչպես վկայում էր թե մանուկների ոգևորությունը, և թե ծնողների դրական արձագանքը ճամբարն իսկապես հաջողվեց. նույնիսկ ցանկություն էին հայտնում երկարաձգել օրերը կամ որոշ ժամանակ անց նորից նման ծրագրով գալ իրենց բակ:
Ոգևորված և գոհ էին բոլորը, թե՛ փոքրերը, թե՛ մեծերը, և թե կազմակերպչական թիմը:
Գոհություն Աստծուն այս անմոռաց և հրաշալի 3 օրի համար…
Ծնողներից երկուսը մեզ հետ կիսվեցին իրենց տպավորություններով
Իմ կարծիքը «Նոր սերունդ» եկեղեցու մասին շատ դրական է, քանի որ Աստծո մասին պատմվում և ներկայացվում է շատ գրագետ ձևով: Իմ խորին շնորհակալությունն եմ հայտնում բոլորիդ, հատկապես ծառայողներին՝ անգամ 1 տարեկան երեխայի հանդեպ հոգատար վերաբերմունք ցույց տալու համար:
Աստծո սերն ու օրհնությունը թո՛ղ լինի ձեր վրա: Աճեցե՛ք, բազմացե՛ք և տարածե՛ք Հիսուսի սերն ամենուրեք:
Անի Գրիգորյան
Մենք մեր բակի անունից անչափ շնորհակալ ենք «Նոր սերունդ» եկեղեցուց:
Մեր երեխաները շատ լավ ուրախացան, երգեցին, պարեցին, խաղեր խաղացին: Շատ գոհ ենք և զգացված:
Մերի Մարտիրոսյան
Սեփ. լրատվություն
