ՆՈՐՈՒԹՅՈՒՆՆԵՐ

Երիտասարդական ծառայության հատուկ հյուրն էր Աբովյանի «Աստծո ժողովուրդ» եկեղեցու հովիվ, «Դերեկ Պրինսի» ծառայության ղեկավար Վազգեն Զոհրաբյանը:

Աշխույժ փառաբանությունից հետո «NG|YOUTH» երիտասարդական ծառայության առաջնորդ Գոռ Կարապետյանը երիտասարդներին ներկայացրեց հյուրին՝ նշելով, որ այսօր Եկեղեցին կարիք ունի համարձակ, նպատակասլաց ու աստվածային տեսիլքի ետևից գնացող անհատների: Նա վկայեց Վազգենի տված օրինակի մասին իր իսկ կյանքի համար:

Վազգեն Զոհրաբյանը խոսեց տեսիլք, երազանք ունելու մասին: Նա բերեց  Ա Մնացորդաց 4-րդ գլխում նկարագրված Գաբեսի օրինակը, ով չնայած իր անվանը, որ «Ցավ» էր նշանակում, երևելի դարձավ  իր եղբայրների մեջ: Անկախ այն բանից, թե մեր մասին ինչպես  են արտահայտվում, ինչ դավանություններ են անում, Տերը կարող է փոխել իրավիճակը, եթե մենք բացվենք Իր առաջ: Գաբեսը առանձնացավ մյուսներից՝ այդ գլխում թվարկված շատ այլ անուններից: Նա կանչեց Իսրայելի Աստծուն, Ով փոխել էր Հակոբի անունը՝ փոխելով նաև ճակատագիրը, և մի պարզ աղոթք արեց 4 կետից բաղկացած,

1. Որպեսզի Տերը օրհնի իրեն,

2. Ընդարձակի իր սահմանները,

3. Ձեռք իր վրա պահի,

4. Պաշտպանի չարից:

Եվ նշված է, որ Տերը շնորհեց, տվեց նրան այդ ամենը:

Վազգենն իր խոսքը համեմում էր իր կյանքի ` հատկապես բանակային շրջանի օրինակներով և պատմություններով, որոնք անչափ քաջալերող և տպավորիչ էին:

Իր խոսքը Վազգենը եզրափակեց աղոթքով, որպեսզի Տերը փոխի անունները, փոխի ճակատագերերը, ընդլայնի երիտասարդների սահմանները՝ օգտագործելով Իր փառքի համար: 

Հանդիպման հաջորդ մասում  հնարավորություն ընձեռնվեց փոքրիկ հյուրասիրության շուրջ շարունակել  շփումը,  ինչպես հյուրի, այնպես էլ միմյանց հետ: 

Աստված ընտրել է բոլորիս. նշանակություն չունի, թե որտեղից ենք մենք, ինչ ընտանիքից, ինչ խնդիրներ ունենք: Մեզ հետ կապված Աստծո ծրագրերը շատ ավելին են, քան մենք կարող ենք պատկերացնել: Ուղղակի պետք է թույլ տանք, որպեսզի Աստված օգտագործի մեզ Իր գործի համար, խնդրենք, որպեսզի ընդլայնի մեր սահմանները՝ ամբողջ սրտով վստահելով, հավատալով  Նրան` մեր ունեցած շնորհները, կարողությունները ծառայեցնենք Իրեն, Նրա փառքը տարածելու համար: