ՆՈՐՈՒԹՅՈՒՆՆԵՐ

Երևանի «Նոր սերունդ» եկեղեցու հովիվ Տիգրան Թադևոսյանը փետրվարի 2-ին, Երևանի ժամանակով ժ 11:00-ին կրկին ամերիկյան ICFN (International Christian Family Network) հեռուստատեսության հյուրն էր: Նրա հետ ուղիղ եթերում զրուցում էր ամերիկահայ հովիվ Թոնի Վարտանյանը:

Զրույցի սկզբում հովիվ Թոնին հետաքրքրվեց Հայաստանի քրիստոնեական կյանքով և եկեղեցիների վիճակով: Հովիվ Տիգրանը գոհունակությամբ նշեց, որ, չնայած որոշակի դժվարություններին, Հայաստանում առկա է կենդանի հավատի և Աստծո Խոսքի ճանաչողության իրական առաջընթաց: Տեղի է ունենում անցում ընդհանուր, անորոշ, «ազգային» հավատից դեպի իրական, կենդանի հավատ՝ հիմնված Աստծո Խոսքի վրա, հավատ, որի դեպքում յուրաքանչյուր քրիստոնյա ահատապես Տեր Հիսուսի հետևորդն է:

Մեկ ժամվա ընթացքում քննարկվեցին մի շարք հարցեր նվիրված ավետարանչությանը, անեծքներից ազատագրմանը, հոգևոր պատերազմին: Հովիվ Տիգրանն իր կյանքի անձնական վկայությամբ ցույց տվեց  դիվային ուժերի հնարանքների դեմ պայքարելու և հաղթելու ուղիները:

Եղան բազմաթիվ հեռախոսազանգեր: Ամերիկահայ համայնքի ներկայացուցիչները խնդրում էին հովիվներին աղոթել իրենց հարազատների ապաքինման, հաջողության և ապաշխարության համար:

Ուշագրավ էր, որ զանգողներից մի կին վկայեց, որ ինչ խոսվում է հաղորդման ժամանակ, կարծես իր կյանքի մասին լինի և նախատեսված է հատուկ իր համար:

Զրույցը կարճ ժամանակով ընդհատվեց և հովիվները աղոթեցին զանգողների խնդրանքների համար:

Հաղորդման ավարտին եղան շնորհակալական զանգեր հովիվ Տիգրանին և հովիվ Թոնիին:

Հովիվ Թոնին սիրով տեղեկացրեց, որ կիրակի օրը՝ փետրվարի 3-ին, իրենց եկեղեցում ծառայելու է հովիվ Տիգրան Թադևոսյանը և հորդորեց բոլոր հեռուստադիտողներին՝ մասնակցել ծառայությանը:

«Նոր սերունդ» եկեղեցու մամլո ծառայություն