Հրաշալի օրեր Սուրբ Հոգու հետ. Ավարտվեց ճամբար 2016-ը
Սևանի հանգստի գոտիներից մեկում հինգ հրաշալի օրեր անցկացվեցին Աստծո Ժողովրդի հետ միասին: Ճամբարն ուներ հագեցած ծրագիր, որն առաջնորդվեց Սուրբ Հոգու ներկայության, խոսքի, երկրպագության մեջ, այն լի էր նորանոր հայտնություններով, մտերմիկ շփումով, հանգստով ու բազմաթիվ ուրախ պահերով:
Ճամբարականները բաժանվել էին 3 թիմերի՝ «կարմիր», «կապույտ» և «նարնջագույն»,
որտեղ ներառված էին ամենատարբեր տարիքի մասնակիցներ:
Թիմակիցների հետ միասին մասնակցում էին տարբեր քննարկումների, մրցույթների և զվարճալի ծրագրերի:
Օրը սկսվում էր մենիկ պահով՝ անձնական ժամ Տիրոջ հետ. աղոթք և Խոսքի ընթերցանություն:
Հինգ օրերի ընթացքում Հովիվ Տիգրան Թադևոսյանը և այլ ծառայողներ ճամբարի մասնակիցների հետ խոսեցին Սուրբ Հոգու, Իր ներկայության մեջ մտնելու, Այն վայելելու, Սուրբ Հոգու հետ մտերմանալու, ընկերանալու, Նրա սերը ճաշակելու, Տիրոջը ճշմարտապես ծառայելու, օծություն ստանալու և այլ թեմաների շուրջ,
որոնք կարևոր հետք կարող են թողնել նրանց կյանքերի համար:
Խոսքից հետո թիմակիցները հանդիպում էին, քննարկում այն
ու կիսվում իրենց հայտնություններով կամ վկայություններով:
Երկրպագությունն ու փառաբանությունը ուղեկցում էին բոլոր միջոցառումներին:
Բոլոր ճամբարականներին միավորում էր Աստծո անսահման Սերն ու միաբանությունը:
Բոլորը գոհանում են Տիրոջը, Հովվին և կազմակերպիչներին այս հրաշալի օրերի համար,
իսկ մի քանիսը կիսվեցիին մեզ հետ իրենց տպավորություններով:
Տպավորություններս անսահման են, խոսքերս՝ սահմանափակ: Սկսեցի նոր ձևով ճանաչել Սուրբ Հոգուն, և այդ նոր ճանաչողությունը տարավ նոր, ուրիշ ներկայության մեջ, ինչը վստահ եմ անհետևանք չի մնա: Ճամբարի խորագիրն էր «Սուրբ հոգու հետ…» և այդպես էլ եղավ…
Ռուզաննա Դալլաքյան
Ճամբարում անց եմ կացրել 5 օրհնված օրեր, յուրաքանչյուր օրն էլ ինձ համար հիանալի ձևով են անցել, քանի որ շատ բաներ եմ սովորել Հովվից: Ճամբարի ընթացքում ձեռք բերեցի նաև շատ ընկերներ ու շատ սիրեցի նրանց: Շնորհակալ եմ Տիրոջը այս հինգ օրերի օրհնությունների համար:
Մարտիկ Օհանյան
Այս տարի առաջին անգամ մասնակցեցի քրիստոնյական ճամբարի: Ինձ շատ դուր եկավ հոգևոր շփումը, կարծես յուրաքանչյուրից բխում է Աստծո սերը: Եվ կարծում եմ այդ սիրուց ոգևորված՝ կյանքից մեջ փոփոխություն կլինի: Հիմա կարծում եմ ամեն ինչում առաջնայինը պետք է Աստված լինի, իսկ տպավորություններս կփորձեմ փոխանցել շրջապատիս: Խնդրում եմ Աստծուն, որ կարողանամ լցվել Սուրբ Հոգով և ծառայել Աստծուն, ու մեծ հաճույքով կցանկանայի ներգրավվել ծառայություններում և մասնակցել նմանատիպ հոգևոր ճամբարներին:
Գևորգ Զաքարյան
