ՆՈՐՈՒԹՅՈՒՆՆԵՐ

Հիսուսը գնում էր խաչելության, նա մենակ էր, բայց խաղաղ էր ու գնում էր հաղթությամբ.

Խաղաղությունը Նրան հաղթություն էր տվել: Հիսուսն ուներ «Աստծո խաղաղությունը, որ ամեն հասկացությունից վեր է» (Փիլիպ. 4:7): Ու ցանկանում էր այդ խաղաղությունը թողնել աշակերտներին.

«Խաղաղութիւն եմ թողում ձեզ, իմ խաղաղութիւնն եմ տալիս ձեզ»։ Հովհ. 14:27:

Խաղաղությունն ունի զորություն: Խաղաղությունը պատերազմի զորավոր գործիք է: Երբ Հիսուսին տանջում էին, ծեծում էին, ծաղրում էին, խաղաղությունն էր Նրան պահում: Անգամ երբ խաչում էին, Նա խաղաղություն ուներ, որ կարողացավ ասել՝ «Հայր, ներիր նրանց...»:

Հիսուսի խաղաղությունը հաղթություն է բերում պատերազմում, հաղթություն է բերում ցանկացած իրավիճակում:

Աշխարհն էլ խաղաղություն ունի, բայց այն խաղաղությունը, որը տալիս է Հիսուսը, համեմատության եզրեր չունի աշխարհի խաղաղության հետ: Աշխարհի խաղաղությունը նման է նարկոզի, որպեսզի չզգաս սատանայի պատճառած ցավը: 

Մի փնտրեք խաղաղությունը աշխարհում: Աշխարհը չունի այն խաղաղությունը, որ տալիս է Հիսուսը՝ աստվածային խաղաղությունը:

Աստված էժանագին ընծա չի տալիս: Աստված տալիս է լավագույնը: Բայց Նա Իր խաղաղությունը տալիս է նրանց, ովքեր արժանացել են դրան.

«Եւ արդարութեան պտուղը խաղաղութիւնով է սերմվում նորանց համար, որ խաղաղութիւն են անում»։ Հակ.3:18:

Խաղաղություն արա և կստանաս Նրա խաղաղությունը: Ու կհաղթես ամեն իրավիճակում, այնպիսի իրավիճակներում, որ աշխարհում անհաղթահարելի են թվում: Անգամ ծանր հիվանդությունների ու կորուստների դեպքում: 

«Դու նորանց կ’որոնես, բայց չես գտնիլ՝ այն քեզ հետ կռիւ անող մարդկանցը»։ Ես. 41:12:

Կորոնես քո դժվարությունները, քո հիվանդությունները, քո թշնամիներին ու չես գտնի: Աստծո խաղաղությունը հաղթություն կբերի:

Ահա այսպիսին էր հունիսի 15-ին «Նոր սերունդ» եկեղեցու հովիվ Տիգրան Թադևոսյանի պատգամը: Հովիվն իր խոսքը հաստատեց սեփական վկայությամբ, հուզիչ ու սրտառուչ պատմությամբ իր սեփական կյանքից: Վկայության շնորհիվ հնարավոր եղավ ընկալել Աստծո խաղաղության ամբողջ խորությունը: 
Հ.Գ. «Նոր սերունդ» եկեղեցու լրատվական ծառայությունը միտումնավոր չի վերարտադրում հովվի վկայությունը, քանի որ վերարտադրությունը չի կարող արտահայտել խաղաղության այն ընկալումն իր ամբողջ խորությամբ, ինչը փորձեց փոխանցել ներկաներին հովիվ Տիգրան Թադևոսյանը: Հովվի պատգամն ամբողջությամբ շուտով կարող եք դիտել մեր կաքում:

Սեփ.լր.