ՆՈՐՈՒԹՅՈՒՆՆԵՐ

Առաջին հանդիպմանը ներկա էին ավելի քան 60 երիտասարդներ,այդ թվում նաև՝ ամուսնացած զույգեր։Ինչպես ցանկացած ծառայություն, այս մեկը նույնպես սկսվեց փառաբանությամբ և աղոթքով, որից հետո հովիվ Տիգրանը ներկաների հետ կիսվեց իր խոսքով:

Նա նշեց, որ ամուսնության և ընտանիքի թեման շատ արդիական է և կարևոր, այն վերաբերում է ինչպես ամուսնացած զույգերին, այնպես էլ  երիտասարդներին, ովքեր իրենց կողակցի որոնումների մեջ են:

Հատված հովվի խոսքից․ «Երկրի ապագան կախված է ընտանիքների ամրությունից: Քրիստոնեությունը միակ ուսուցումն է, որտեղ  քրիստոնեական արժեքները որպես հիմք են մնացել: Մյուս բոլոր գիտությունները և ուսմունքները միայն խոսում են կնոջ և տղամարդու հարաբերությունների մասին, բայց Եկեղեցին խոսում է ընտանիքի մասին:

Շատերը մտածում են, որ հավատացյալ մարդիկ ոչինչ չեն հասկանում այդ հարաբերություններից, բայց իրականում կյանքը, ամուսնական հարաբերությունները հասկանում են այն մարդիկ, ովքեր հարաբերություն ունեն Աստծո և Նրա խոսքի հետ:

Ընտանիքը փոքր եկեղեցի է, որտեղ գործում են եկեղեցու օրենքները, կարգ ու կանոնը, և որտեղ թագավորում է Աստված, Աստծո խոսքը, աղոթքը, երկրպագությունը:

Ընտանիքն ու եկեղեցին փոխկապակցված են: Եթե մեկն ասում է՝ ընտանիք, և նա Աստծո խոսքից հեռու է, դա չի կարող դիտարկվել այնպիսի ընտանիք, ինչպիսին որ նախասահմանել է Աստված, իսկ Աստված ընտանիքը նախասահմանել է ամեն ինչից առաջ:

Ստեղծելով մարդուն՝ Աստված տեսավ, որ լավ չէ, որ մարդը մենակ լինի: Նա գիտի, որ մենք շփման կարիք ունենք: Աստված կամենում է , որ մարդն իրացնի իր մեջ կուտակված շփվելու ցանկությունը:

Աստված հավանություն չի տալիս ամուսնալուծություններին: Բաժանություն պետք է լինի  միայն ծայրահեղ դեպքում (Մատթ. 19:3-8):

Իսկ որտեղի՞ց են գալիս բաժանումները, որտեղի՞ց են գալիս սխալ պատկերացումները ընտանիքի մասին:

Խնդիրը  առաջին հերթին դաստիարակության մեջ է: Ներկայիս ընտանիքներում՝ ծնող-երեխա հարաբերություններում, շատ  քիչ է քննարկվում երեխայի ապագա ընտանիքին վերաբերող հարցերը:

Երկրորդ հերթին, երեխայի դեռ չձևավորված պատկերացումների վրա ազդում են ուսումնական հաստատություններում սխալ ուսուցումները և շրջապատը:

Մարդու՝ հատկապես երիտասարդների վրա կարող են ազդել ծնողները, հովիվը և ուսուցիչը, ովքեր ձևավորում են նրա մտածելակերպը: Իսկ նրանցից անգամ մեկի սխալ ազդեցությունը հանգեցնում է մտածելակերպի սխալ ձևավորման:

Ճիշտ ընտանիք կազմելը կյանքի խնդիր է, և այն ժամանակը, որը ծախսում ենք ընտրություն կատարելու վրա, անիմաստ չէ:

Ընտանիքի մեջ երջանկություն կա միայն այն դեպքում, երբ երկու կողմերն էլ հասկանում են, թե ինչ է ամուսնությունը, կան ճիշտ հարաբերություններ, և երբ այդ միությունը Աստծո իշխանության տակ է»:

Ծառայությունը ավարտվեց աղոթքով, որից հետո փոքրիկ հյուրասիրոււթյան  շուրջ երիտասարդները շփվում էին և կիսվում կարծիքներով: 

                                                                                                           Լիլիթ Գրիգորյան

                                                                                                            Գոհար Մկրտչյան

                                                                                                                Նաիրա Փիլոյան