«Նոր սերունդը» շնորհավորում է Հանդուրժողականության միջազգային օրը
1995 թվականի նոյեմբերի 16-ին ՅՈՒՆԵՍԿՈ-ի անդամ պետություններն ընդունեցին Հանդուրժողականության սկզբունքների հռչակագիրը:
1997-ին Միավորված ազգերի կազմակերպության Գլխավոր ասամբլեան անդամ պետություններին առաջարկեց ամեն տարվա նոյեմբերի 16-ը նշել որպես Հանդուրժողականության միջազգային օր:
Հանդուրժողականության սկզբունքների հռչակագրում ասվում է, որ մարդիկ տարբեր են բնույթով, արտաքինով, դիրքով, լեզվով և արժեքներով, սակայն բոլորն էլ աշխարհում ապրելու և իրենց անհատականությունը պահպանելու իրավունք ունեն:
Հռչակագիրը հանդուրժողականությունը սահմանում է որպես «հարգանք աշխարհի մշակույթների, մեր ինքնարտահայտման ձևերի և մարդկային անհատականության դրսևորումների հարուստ բազմազանության նկատմամբ, դրանց ընդունումը և ճիշտ ընկալումը»:
Արդյո՞ք հանդուրժողականությունը սահմաններ ունի:
Քրիստոնյայի համար այս հարցի պատասխանը Հիսուս Քրիստոսի կյանքն է: Հիսուսը հանդուրժում էր բոլորին, այդ թվում՝ մեղավորներին: Հիսուսը չէր հանդուրժում մեղքը: Հիսուսը պայքարում էր մեղքի դեմ: Հիսուսը խաչափայտին գամեց մեղքը, որպեսզի բոլոր նրանք, ում համար գարշելի է մեղքը, հավատալով Հիսուսին, ազատվեն մեղքից և դառնան մեղքի դեմ պայքարի առաջամարտիկներ:
Հանդուրժողականություն՝ չի՛ նշանակում ամենաթողություն:
Հանդուրժողականություն՝ չի՛ նշանակում անպատժելիություն:
Հանդուրժողականությունը Սեր է, որով պետք է առաջնորդվել անարդարին դեպի արդարություն բերելու, անբարոյին դեպի առաքինություն բերելու, եսասերին դեպի մարդասիրություն բերելու ճանապարհին:
Լինե՛նք հանդուրժող:
